(දෙසැම්බර් 15, 2010)පස් වසරක් ඇතුළත ශ්‍රී ලංකාවේ සමස්ත ගුරු සංඛ්‍යාව සියයට 14 කින් වර්ධනය වී ඇති බව අධ්‍යාපන අමාත්‍යාංශය කියයි. 2005 වර්ෂයට සාපේක්‍ෂව 2009 වර්ෂය වන විට එම වර්ධනය වී තිබේ. එම වැඩිවීම 27380 කි. 2005 දී ගුරුවරුන් ගණන 189234 ක් විය. 2009 දී ගුරුවරුන් සංඛ්‍යාව 216614 ක් දක්වා වර්ධනය වී ඇත.
2010 වර්ෂයේදී ගුරුවරුන් 3238 ක් 2006 සිට 2009 දක්වා උපාධිධාරී ගුරුවරුන්ගේ වර්ධනය ද යහපත් ප්‍රගතියක් පෙන්වන බව අමාත්‍යාංශය කියයි. 2006 දී රජයේ පාසල්වල උපාධිධාරී ගුරුවරුන් 68705 ක් සිටියහ. ප්‍රතිශතය 33.57 ක් විය.
2009 දී එම ප්‍රමාණය 77223 ක් දක්වා වර්ධනය විය. ප්‍රතිශතය 35.75 කි. 2011 වර්ෂයට නවක ගුරුවරුන් 8874 ක් බඳවා ගැනීමට සැළසුම් කර ඇත. ගුරු හිඟය සහිත විෂයයන් ඉගැන්වීම සඳහා ඔවුන් යොමුකරන බව ද අමාත්‍යාංශය සඳහන් කරයි.
දිනමිණ, 200-12-15
ලංකාවේ ගුරුවරු කීයක් සිටිත් ද?
අයෑදුම්පත් කැඳවා සම්මුඛ පරීක්‌ෂණ පැවැත්වුවත් ජාතික පාසල් රැසක තවමත් පුරප්පාඩු පුරවා නැහැ, ලංකා ගුරු සංගමය කියයි
(දෙසැම්බර් 03, දිවයින) ජාතික පාසල් 87 ක විදුහල්පති පුරප්පාඩු පිරවීම සඳහා මීට මාස කිහිපයකට පෙර අයදුම්පත් කැඳවා අධ්‍යාපන අමාත්‍යාංශය මේ වන විට සම්මුඛ පරීක්‌ෂණද අවසන් කර ඇතත් තවමත් විදුහල් රැසක පුරප්පාඩු පුරවා නැතැයි ලංකා ගුරු සංගමය පවසයි.
නිවේදනයක්‌ නිකුත් කරමින් මේ බව පවසන එම සංගමය එහි මෙසේද සඳහන් කර ඇත.
ජාතික පාසල්වල විදුහල්පති තනතුරු දැරීමට ශ්‍රී ලංකා අධ්‍යාපන පරිපාලන සේවයේ සාමාන්‍ය සේවක සංඛ්‍යාවට පත්වීම් ලද පිරිස්‌ ද ශ්‍රී ලංකා විදුහල්පති සේවයේ පත්වීම් ලද පිරිස්‌ ද සුදුසුකම් ලබති. මෙසේ සුදුසුකම් ලැබූවන් අදාළ පුරප්පාඩු විදුහල්පති තනතුරු සඳහා අයෑදුම් කොට සම්මුඛ පරික්‍ෂණවලට ද පෙනී සිට සියලු කටයුතු අවසන්ව තිබිය දීත්ණී ඉහත පුරප්පාඩු තනතුරු වල දේශපාලන හිතවත්කම් මත අවිධිමත් පත්වීම් ලැබූවන් කටයුතු කරති.
එසේම 2005 විදුහල්පති සේවයේ පැවති 2 II පන්තිය සඳහා පුරප්පාඩු 1918 ක් සහ III පන්තිය සඳහා පැවති පුරප්පාඩු 2200 සඳහා තරග විභාගයක්‌ පවත්වා 2009. 11. 13 වැනිs දින පත්වීම් ලද විදුහල්පතිවරුන් බහුතරයකට අදාළ පත්වීමට අනුව පාසල් වල ස්‌ථාන ගත නොකිරීමෙන් ඔවුන් පාසල් ඉගැන්වීම් කටයුතු වල නිරත වෙති.
1999. 11. 07 වැනි දින අධ්‍යාපන පරිපාලන සේවයේ පළමු පන්තියට උසස්වීම් ලැබූ 196 දෙනකු සිටියදී ඔවුන්ගෙන් පිරිසකට ද හිමි තනතුර ලබා නොදී එම තනතුරුවල වැඩ බලන නිලධාරීන්ට කටයුතු කිරීමට ඉඩ සලසා ඇත.
මේ ආකාරයට අධ්‍යාපනයේ ඉහළ තනතුරු සඳහා සුදුසුකම් ලත් පිරිස්‌ සිටියදී දේශපාලන හිතවත්කම් මත අවිධිමත්ව පත්වූවන්ට තනතුරු වල සේවය කිරීමට ඉඩ සැලසීම හරහා අධ්‍යාපනය බරපතල ලෙස දේශපාලනීකරණය වීම නතර කොට සුදුස්‌සන් අදාළ තනතුරුවලට පත්කොට අධ්‍යාපන පද්ධතිය විධිමත් කරන ලෙස ලංකා ගුරු සංගමය ඉල්ලා සිටියි
ගුරු සහයකයින් ගුරු සේවා ව්‍යවස්ථාව අනුව ගුරු සේවයට අන්තර්ග‍්‍රහනය කරන ලෙස බල කළ උද්ඝෝෂණය
2010/10/06 පෙ.ව 11.00 ට ඉසුරුපාය ඉදිරිපිට දී
ග‍්‍රී ලංකා ගුරු සේවා ව්‍යවස්ථාවට පරිබාහිරව ගුරු සේවයේ යොදවා ඇති ගුරු සහයකයින් එම ව්‍යවස්ථාවට අනුව ලබා ගන්නා සුදුසුකම් මත ගුරු සේවයට ඇතලත් කරගන්නා ලෙස බල කරන උද්ඝෝෂණයක් 2010/10/06 ලෝක ගුරු දිනය දා පැලවත්ත අධ්‍යාපන අමාත්‍යාංශය ඉදිරිපිටදි පැවැතවීණි.
මේ වන විට රු. 3,000 ක දීමනාවට පමණක් සේවය කරන මෙම ගුරු පිරිසෙන් වැඩි පිරිසක් ගුරු විද්‍යාලවලද පුහුණුව ලබති.
අඩු වැටුපකට සමාන සේවයක යෙදෙන මෙම ගුරු පිරිස වහාම ගුරු සේවයට ඇතුලත් කරන ලෙස ඉල්ලා මෙම උද්ඝෝෂණය පැවැත්විණි.
අඩු වැටුපකට සමාන සේවයක යෙදෙන මෙම ගුරු පිරිස වහාම ගුරු සේවයට ඇතුලත් කරන ලෙස ඉල්ලා මෙම උද්ඝෝෂණය පැවැත්විණි.
උතුරු මැද ගුරු මාරු මණ්ඩල රැස්‌වීමේදී ගත් සියලු තීරණ නොවැම්බර් 8දා තෙක්‌ බලරහිත කරයි
අනුරාධපුර විශේෂ - පර්සි කුරුනේරු (දිවයින)
(ඔක්තෝබර් 31, 2010) උතුරු මැද පළාත් අධ්‍යාපන අධ්යක්ෂවරයා විසින් කැඳවන ලද උතුරු මැද පළාත් ගුරු මාරු මණ්ඩල රැස්‌වීම හා එහිදී ගන්නා ලද සියලු තීරණ ලබන මස 08 වැනිදා තෙක්‌ බලරහිත කරමින් උතුරු මැද පළාත් බද සිවිල් අභියාචනාධිකරණය අතුරු තහනම් නියෝගයක්‌ නිකුත් කළේය.
ජ්‍යෙෂ්ඨ නීතිඥ කරුණාරත්න හේරත් මහතා මගින් ලංකා ගුරු සංගමය, ලංකා ගුරු සේවා සංගමය, අධ්‍යාපන වෘත්තිකයන්ගේ සංගමය, සහ සමස්ත ලංකා එක්‌සත් ගුරු සංගමය විසින් ඉදිරිපත් කළ පෙත්සමක්‌ කළකා බැලූ බන්දුල කරුණාරත්න හා කුමාර රත්නායක යන මහත්වරුන්ගෙන් සැදුම්ලත් ද්විපුද්ගල අභියාචනාධිකරණ විනිසුරු මඩුල්ල විසින් මෙම අතුරු තහනම් නියෝගය නිකුත් කෙරිණි.
මෙම පෙත්සමේ වග උත්තරකරුවන් ලෙස උතුරු මැද පළාත් අධ්‍යාපන අධ්‍යක්‍ෂ එච්. කේ. එම්. ජිනපාල, උතුරු මැද පළාත් අධ්‍යාපන ලේකම් ආනන්ද කුලරත්න සහ උතුරු මැද පළාත් ආණ්‌ඩුකාර ලේකම් ආර්. එම්. එස්. බී. රත්නායක යන මහත්වරුන් නම් කොට ඇති අතර ඔවුනට ලබන මස 08 වැනිදා උතුරු මැද පළාත් බද සිවිල් අභියාචනාධිකරණය හමුවේ පෙනී සිටින ලෙසද නියෝග කෙරිණි.
මෙම පෙත්සමින් නම් කොට ඇති පළමු වග උත්තරකාර උතුරු මැද පළාත් අධ්‍යාපන අධ්යක්ෂවරයා විසින් ඉකුත් 05 වැනිදා කැඳවනු ලැබූ ගුරුමාරු මණ්ඩල රැස්‌වීම හා එහිදී ගන්නා ලද සියලු තීරණ නීති විරෝධී බවත්, එම නීති විරෝධී ඒක පාර්ශ්වික ගුරුමාරු මණ්ඩල රැස්‌වීමේදී අනුමත කොට ඇති ගුරු ස්‌ථාන මාරුවීම් තුන්සියයද මුළුමණින්ම නීති විරෝධී බවත් පෙත්සම්කරුවන් වෙනුවෙන් පෙනී සිටි ජ්‍යෙෂ්ඨ නීතිඥ කරුණාරත්න හේරත් මහතා අධිකරණයට කරුණු දක්‌වමින් කියා සිටියේය.
එමෙන්ම පළමුවන වග උත්තකාර උතුරු මැද පළාත් අධ්‍යාපන අධ්යක්ෂවරයා උතුරු මැද පළාත් ආණ්‌ඩුකාරවරයාගේ හා උතුරු මැද පළාත් අධ්‍යාපන අමාත්‍යාංශ ලේකම්වරයාගේ නියෝගද නොසළකා හරිමින් හිතුවක්‌කාරී අන්දමින් කටයුතු කරන බවත්, ඔහු විසින් කැඳවනු ලැබූ නීති විරෝධී ගුරු මාරුමණ්‌ඩල රැස්‌වීමේදී ගන්නා ලද තීරණ හේතුවෙන් තම සේවාදායකයන් හට විශාල අසාධාරණයක්‌ සිදුවී ඇති බවත් නීතිඥ කරුණාරත්න හේරත් මහතා අධිකරණයට කරුණු දක්‌වමින් වැඩිදුරටත් පැවැසීය.
පෙත්සම්කාර ගුරු සංගම් නියෝජනය කරමින් ලංකා ගුරු සේවා සංගමය වෙනුවෙන් අරුණ දිසානායක, අධ්‍යාපන වෘත්තිකයන්ගේ සංගමය වෙනුවෙන් ආනන්ද අටුගොඩ හා සමස්ත ලංකා එක්‌සත් ගුරු සංගමය වෙනුවෙන් ටී. සබ්රි යන මහත්වරුද අධිකරණය හමුවේ පෙනී සිටියහ.
ලංකා ගුරු සංගමයේ 53වන නියෝජිත සම්මේලනය ඔක්තෝම්බර් 29
අධ්‍යාපනයේ සම අවස්ථා වෙනුවෙන් සටන් වදිමු !
ලංකා ගුරු සංගමයේ 53වන නියෝජිත සම්මේලනය 2010 ඔක්තෝම්බර් 29 සිකුරාදා දින පෙ.ව. 9.00 සිට ප.ව. 3.00 දක්වා හැටන් CWF ශාලාවේදී (හයිලන්ඞ්ස් විදුහල පිටුපස)
53වෙනි නියෝජිත සම්මේලනයේ සභාපති මණ්ඩලය
01. සී. ජයතුංග සහෝදරයා (සභාපති)
02. එස්. ත්‍යාගලිංගම් සහෝදරයා (උප සභාපති)
03. අයි. ජයසිංහ සහෝදරයා (උප සභාපති)
04. එච්. එම්. සමීන් සහෝදරයා (උප සභාපති)
05. වසන්ති දිසානායක සහෝදරිය (උප සභාපතිනී)
න්‍යාය පත‍්‍රය
01. පිළිගැනීමේ කථාව
02. සම්මේලනය නීත්‍යානුකූල කිරීමේ යෝජනාව
03. මිය ගිය ගුරු නායකයන් සහ කි‍්‍රයාධරයන් සිහි කිරීම
04. සභාපතිගේ කථාව
05. 2009/2010 නියෝජිත සම්මේලන වාර්තාව සම්මත කිරීම.
06. 2010-2011 ලේකම් වාර්තාව, යෝජනා සහ ඉල්ලීම් සාකච්ඡා කිරීම - සම්මත කිරීම
07. 2010-2011 වසර සඳහා සභාපති, ප‍්‍රධාන ලේකම්, හා ප‍්‍රධාන භාණ්ඩාගාරික තෝරා පත්කර ගැනීම.
08. 2009/2010 අයවැය සම්මත කිරීම.
09. වෙනත් යෝජනා
10. ස්තුති කථාව
අධ්‍යාපන යෝජනා ඉතිහාසයට පෙරවදනක්
ලෝක සිතියම තුළ අප හඳුනාගන්නා රාජ්‍යයන් අතර යම් පදනමක් සහිත ඓතිහාසික මානව ක‍්‍රම විකාශනයක් ඔස්සේ ගොඩනැගී ඇති රටක් ලෙස හැදෑරීමට ශී‍්‍ර ලංකාව වැදගත් වේ. වසර 500 කට ආසන්නව යටත් විජිත ආධිපත්‍යධාරීන් (එයින් වසර 150 ක් තිස්සේ බි‍්‍රතාන්‍ය අධිරාජ්‍යය විසින් ඍජුව මෙහෙයවන ලද දේශපාලන හා රාජ්‍ය කි‍්‍රයාදාමයන්ගේ ඉතිහාස පරිච්ෙඡ්දයකින් පසු) අප දේශපාලන නිදහස ලබාගෙන 60 වසරක් ගතව ඇත. එනම් පශ්චාත් යටත් විජිත සන්දර්භයක දියත් වූ ජාතික දේශපාලන කි‍්‍රයාදාමයට, එහි රාජ්‍ය ව්‍යාපෘතියට හා ඒ රාමුව යටතේ විකාශය වූ සමාජ ගමනට 62 වසරක් ගතව ඇත.
ස්වයංපෝෂිත ආර්ථිකයක් ගොඩනගමින්, පරිසරයත්, මානව සමාජයත් අන්‍යොන්‍ය වශයෙන් බැදුනු අවියෝජනීයව ගොඩනැගුණු ඉතිහාසයක් අපට උරුම වී තිබුණු බව අපි උගන්වමින් සිටිමු. භෞතික පරිසරයත් සමග පැවති රාජ්‍ය ප‍්‍රතිපත්තියථ පරිසර සම්පත් සමග බද්ධ වූ ආර්ථික පදනම, ස්වභාවික සම්පත් කෙරෙහි පැවති ආකල්ප, භූමි කළමනාකරණය හා ජල කළමනාකරණය ආදී ක්‍ෂෙත‍්‍ර අධ්‍යාපන විෂය හා බැදුනු නිපුණතාවලදී දැක්වෙයි.
ඕනෑම සමාජයක ගැටළු ඇතිවීම අනිවාර්ය ය. පරිණත සමාජ දේශපාලන ජීවිතයක් ගොඩනැගුණු සමාජයක විශේෂත්වය වන්නේ ගැටළු ඇති නොවීම නොව ගැටළු අර්බුද බවට පත්වීමට පෙර වේගයෙන් හා විධිමත්ව විසඳා ගැනීම උදෙසා අදාළ කි‍්‍රයාවලීන් සමාජ දේශපාලන - සංස්කෘතික ගර්භයන්ගෙන් දියත් වීමයි. එනමුත් සමාජයක ගැටළු විනාශකාරී ඝට්ටනබවට පත් වී, සමාජය දෙදරුම් කවමින්. ශිෂ්ටාචාරමය අර්බුද දක්වා දිවෙන විට, එයින් ගම්‍ය වන සරල සත්‍ය නම් එකී සමාජයට තම ගැටළු විසඳා ගැනීමට හැකියාවක් නොමැති බවයි. එවැනි කි‍්‍රයාවලීන් උත්පාදනය කර ගැනීමට සමාජය අසමත් බවයි. සමාජ දේශපාලන ජීවිතය දරුණු රෝගී තත්වයකට පිවිස ඇති බවයි. නිදහසින් පසු ගෙවී ගිය කාලය දකුණේ තරුණ කැරලි දෙකකින්ද දශක 3 කට ආසන්න කාලයක් තිස්සේ උතුරු නැගෙනහිර තරුණයන්ගේ යුද්ධයත් ඛේදනිය ලෙස සංලක්ෂිතය.
සම්ප‍්‍රදායික දේශපාලන චින්තනයේ මූලික පිළිගැනීම් ගැඹුරින් ප‍්‍රශ්න කළ යුතු අවධියකට අපි අවතීරණය වෙමින් සිටිමු. ශිෂ්ටාචාර තුළ ශිෂ්ටාචාර අර්බුදයක් දක්වා උග්ර වුණු ආර්ථික සමාජ දේශපාලන සංස්කෘතික අර්බුදයන් විසඳා ගැනීමට ජාතික දේශපාලනය හා එහි නායකත්වය කෙරෙහි තැබූ විශ්වාසය හා අපේක්‍ෂා අළුත් වටයකින් විනාශ වෙමින් පවතී.
ඉතා සීමිත වශයෙන් වුවද පසුගිය වසර කීපය තුළ සිවිල් ව්‍යාපාර (වෘත්තීය සමිති ව්‍යාපාරය ගෙනගිය අයිතීන් දිනාගැනීමේ අරගල, මානව හිමිකම්, සිවිල් දේශපාලන අයිතීන්, මාධ්‍ය නිදහස, පරිසර ව්‍යාපාර යනාදී* විසින් සටහන් කරන්නේ ජාතික දේශපාලන නායකත්වයටත්, රාජ්‍යයටත් මේ අර්බුද විසඳීමට භාරදී පසෙකට වී බලා සිටීමට ජනතාව තවදුරටත් සූදානම් නොවිය යුතුය යන්නයි. පශ්චාත් - යටත් විජිත යුගයේදී ජාතික රාජ්‍ය ව්‍යාපෘතිය ඔස්සේ සිදුවූයේ ලංකාවේ ප‍්‍රජාතාන්තී‍්‍රය දේශපාලන ව්‍යුහයන්, පරිණත වී වඩ වඩා ජන සහාභාගී දේශපාලන සංස්කෘතියක් වර්ධනය වීම නොව අධිකාරීවාදී දේශපාලන සංස්කෘතියක් මුල් අල්ලා ස්ථාපනය වීමයි.
මේ ජාතික දේශපාලනයේ මෙහෙයවීම යටතේ ජාතික රාජ්‍ය ගමන්ගත් මාර්ගයේ ඍජු ප‍්‍රතිඵලයක් වන්නේ විවිධ සමාජ කණ්ඩායම්, සුළු ජනවර්ග, පීඩිත දිළිදු ජන කොටස් රාජ්‍යයත්වයෙන් බැහැර කොට සමාජයේ අද්දර සීමාන්ට තල්ලූ කිරීමත්, විශේෂයෙන්ම එහි එක් සුවිශේෂ පැත්තක් ලෙස රාජ්‍යය සකස් වී වර්ධනය වීමේදී ජනවාර්ගික රේඛාව ඔස්සේ තදබල ආන්තීකරණයක් සිදුවීමත්ය. මෙයින් සමාජය ඉරිතලා ගොස් පසුගිය දශක 3 ක කාලයක් තිස්සේ සමාජය හා රජය අතරත්, සමාජය තුළත් දරුණු පිපිරීම් සිදුවෙමින් පැවති අතර, රාජ්‍යයද මූලික පාර්ශ්වයක් වන මෙම විනාශකාරී ගැටුම් කළමනාකරණය කර ගැනීමට සමාජයට හා රජයට මග පෙන්වීමට ජාතික නායකත්වය මුළුමනින්ම අපොහොසත් විය. නමුත් අද වන විට ලෝකයේ සබුද්ධිකව කල්පනා කරන සෑම කෙනෙකුම පොදුවේ පිළිගෙන ඇති දෙයක් වන්නේ විනාශකාරී සිවිල් යුද්ධ ප‍්‍රයත්නයන් මගින් අපේක්ෂිත ප්රතිඵල ඉටුකර ගැනීමට හැකි නොවන බවයි. ලංකාවේ දෙමළ ජාතික ව්‍යාපාරය පරාජයට පත් කළ ද ජාතික ගැටළුවේ අර්බුදය විසඳී නැත; ගැටුමේ ස්වරූපය වෙනස් වී වඩාත් සංකීර්ණ සහ භයානක තත්වයකට පත්වෙමින් තිබේ. එය විසඳීමට දැවැන්ත අධ්‍යාපන කි‍්‍රයාවලියක් අවශ්‍ය වේ.
අද ලෝකයේ සියලූ ආකාරයේ සමාජයන් සිසාරා ආර්ථික, සාමාජික, සංස්කෘතික යන සියලූ ජීවන ක්‍ෂෙත‍්‍ර විනිවිද යන ජගත්කරණ කි‍්‍රයාවලිය අතිශයින්ම ප‍්‍රතිවිරෝධාත්මක ස්වභාවයන්ගෙන් යුක්තය. මෙහිලා මානව ශිෂ්ටාචාරය ලෝක පරිමාණයෙන් අනතුරේ හෙලන්නට සමත්, ලෝකයේ ප‍්‍රාග්ධන බල කේන්ද්‍රයන් විසින් මෙහෙයවනු ලබන අගතිගාමී කි‍්‍රයාවලීන්ගෙන් ජනතාව ආරක්‍ෂා කර ගැනීමට ජාතික නායකත්වය (වහසිබස් දෙසාබාන) හා රාජ්‍යය මුළුමනින්ම අපොහොසත් වී ඇතිවා පමණක් නොව, එකී ප‍්‍රාග්ධන සැලසුම් කිසිදු ප‍්‍රතිරෝධයකින් හෙට්ටුකිරීමකින් පවා තොරව ලංකාව තුළ කි‍්‍රයාත්මක කරන්නට බැඳී සිටින බල කේන්ද්‍රයන්ගේ හුදු ඒජන්තයෙක් හා සංවිධායකයෙක් බවට එය පත්ව සිටී. මෙහි අතුරුඵලයක් හැටියට දේශපාලනය මහා පරිමාණයෙන් මූල්‍යකරණයට භාජනය වී තිබේ.
මේ තතු යටතේ බැලූ බැල්මට ප‍්‍රජාතන්ත‍්‍රවාදී සේ පෙනෙන ජන්ද කි‍්‍රයාවලී හරහා අරුම පුදුම දෙයක් සිදුවෙනවා මෙන් ජනතාවට පෙනී යයි. තමන් ඓන්ද්‍රියව නියෝජනය නොකරන තමන්ගේ ඓන්ද්‍රිය නායකයන් නොවන විශේෂ බලවතුන් පිරිසක් දිගින් දිගටම පුදුමාකාර ලෙස තමන්ගේම කැමැත්තෙන් බලයට පැමිණ, තමන්ගේ ඉරණම සමග අතිශය වගීම් රහිත කී‍්‍රඩාවක යෙදෙනවාක් මෙන් ජනතාවට පෙනී යයි. ජාතික රාජ්‍ය කි‍්‍රයාවලිය විසින් අගතිගාමී ආකාරයට ඇතිදැඩි කර ගන්නා ලද සම්ප‍්‍රදායික දේශපාලන ප‍්‍රභූත්වය, දැන් ගුණාත්මක වශයෙන් අලූත් ඉමක් පැන (ඡන්ද කි‍්‍රයාවලිය තදින් මූල්‍යකරණය වීමත් සමග) අන්ත දූෂිත සහ පරපෝෂිත පැලැන්තියක් බවට පිරිහෙමින් සිටී. රාජ්‍ය (නිලබල) ප‍්‍රභූත්වය, මිලිටරි ප‍්‍රභූත්වය හා දේශපාලන ප‍්‍රභූත්වය එක පසෙකිනුත්, එම ප‍්‍රභූත්වයට පිටුපසින් සිට ඔවුන් මෙහෙයවීමට තරම් බලවත් පන්තිමය ව්‍යාපාරික ප‍්‍රභූත්වය හා අනෙක් පසිනුත් සිට දේශපාලන බලය ව්‍යුහයනය කරන ආකාරය අපට පෙනී යා යුතුය.
සාමය, ප‍්‍රජාතන්ත‍්‍රවාදය, සමාජ සාධාරණත්වය, චිරස්ථායී සංවර්ධනය, (මානව සංවර්ධනය, සංස්කෘතික විවිධත්වය රැුකීම හා සංස්කෘතික ප‍්‍රගමනය යන මානව ගරුත්වයතහවුරු කරන, මානව ශිෂ්ටාචාරයේ අදියරක් සටහන් කරන මූලධර්ම පද්ධතිය (ප‍්‍රතිසංස්කරණවල ලිඛිතව සටහන් වුවද) ජාතික දේශපාලනයේ හා රාජ්‍යයත්වයේ න්‍යාය පත‍්‍රයෙන් බැහැර කෙරී ඇත.
සාමය යනු විවිධ සාධක රැුසක් සමග එකට වෙළී පවතින කි‍්‍රයාදාමයක් නිසා එම සාධකවලින් එකක් වුවද නොසලකා හැරීම එය සාක්ශාත්කරණයට බාධාවකි. අධ්‍යාපනය, රැුකියා අවස්ථා, ඉඩම්, භාෂා අයිතිවාසිකම් හා වෙනත් ප‍්‍රශ්න සුළු ජාතික දිළිදු කොටස්වලට (වඩාත් බරපතල බව අවධාරණය කරමින්) මෙන්ම මහජාතියේ පීඩිත කොටස් වලට පොදු අතර අත් වූ අවාසිය ඛේදනීය ය. අද අප මුහුණ පා සිටින්නේ ව්‍යාජ පොරොන්දු, නීතිය සාමය බිඳවැටීම, සාදාචාරධර්ම බිඳ වැටීම, හා දූෂණය භීෂණය ගහන සමාජයකටය. ජනතාව අතිශයින්ම දුර්මුඛ තත්වයකට පත්ව සිටින මොහොතේ ප‍්‍රධානම අවශ්‍යතාවය වන්නේ දුර දක්නා නුවණින් යුත් නායකත්වය යි.
ආණ්ඩුක‍්‍රමය කුමක් වුවද, බලය පැවරීම සඳහා යොදා ගන්නා ආදර්ශය කුමක් වුවත්, යම් යම් මූලික අයිතිවාසිකම් වෙනස් කළ නොහැකි ලෙසද, රට පුරාම බලපැවැත් විය යුතු ලෙසද නීතිගත කර ගත යුතුවේ. ඕනෑම අවස්ථාවක පනතක් ආණ්ඩුක‍්‍රම ව්‍යවස්ථාවන්ට අනුකූලද යනු විභාග කර බැලීමට අධිකරණයට ඉඩ තිබිය යුතුය. අධිකරණය ස්වාධීන විය යුතුය. විධායක ජනාධිපති ධූරයේ අන්‍යොන්‍ය බලතල සංවරණය හා තුලනය වීම සඳහා සුදුසු ව්‍යවස්ථානුකූල විධි විධාන පැනවිය යුතුය. අදහස් ප්රකාශ කිරීමේ හා සමාගම් පිහිටුවීමේ නිදහස, විශේෂයෙන් එකඟ නොවීමේ නිදහස, නීතියෙනුත්, කි‍්‍රයාවෙනුත් සපුරා සහතික කළ යුතුය. භීෂණයෙන් තොරව සාමයෙන් ජීවත්වීමට සියලූ ජනතාවට තිබෙන අයිතිය පිළිගත යුතුය. සමස්ත ජනතාවගේම මානව අයිතිවාසිකම් සහතික කළ යුතුය. මර්දනකාරී නීති ඉවත් කළ යුතුය. තමන්ගේ විශ්වාසය දිනාගෙන සිටින හා තමන් ගරු කරන බලධාරී නියෝජිතයින් හා විවිධ ජනමාධ්‍ය මගින් උතුරු නැගෙනහිර තුළ පළාතටත් සෙසු පළාත්වලටත් බලය පවරා දීමේ අර්ථය හා අරමුණු සරල බසින් පැහැදිලි කර දුනහොත් බලය පවරාදීමේ මුළු සංකල්පය ජනතාව පිළිගනු නියතය.
තිරසාර පදනමක් මත පිහිටා ගහ කොල සතා සිවුපාවාට, පසට, ජලයට කිසිදු හානියක් නොවන අයුරින් ජන ජීවිතය සංවිධානය කිරීම සඳහා පුළුල් දෘෂ්ටියකින් නොවිධිමත් හා අවිධිමත් අධ්‍යාපනය ශක්තිමත් කළ යුත්තේ පටු ජාතිවාදයෙන් තොර, බහුජාතික සමාගම්වල උගුල්වල නොවැටී සියලූ ජන වර්ග නියෝජනය වන ජාතික ප‍්‍රතිපත්තියක් අධ්‍යාපන කි‍්‍රයාවලිය තුළ කි‍්‍රයාත්මක කිරීමෙන්ය. (සංවර්ධනයේදී තිරසාර සංවර්ධනයක් කෙරෙහි අවධානය යොමු කරන සංවිධාන පිහිටුවන ඊට දෘෂ්ටිමය නායකත්වයක් සැපයිය යුතුය) වර්තමානයේ පරිසර ක්‍ෂෙත‍්‍රයේ තීන්දු තීරණ ගන්නා වූ ප‍්‍රතිපත්ති සම්පාදකයින්ට, කි‍්‍රයාවට නංවන පරිපාලකයින්ට, පාසල් බලධාරීන්ට නිසි මාර්ගෝපදේශයන් සපයන්නේ නැත.
නීතිමය වශයෙන් පවතින සමුද්‍ර දූෂණ වැලැක්වීමේ අධිකාරී පනත, වනසත්ව හා වෘක්ෂලාත ආඥා පනත, පතල් හා ඛනිජ ද්‍රව්‍ය පනත, ජාතික පාරිසරික පනත ආදිය පොතට සීමා නොවී සාදාචාරාත්මකව හා ආචාර විද්‍යාත්මකව ජනතාවට හා පාලකයින්ට සන්නිවේදනය වන අයුරින් නොවිධිමත් අධ්‍යාපනය පුළුල් කළ යුතුය.
නව අධ්‍යාපන පනතක් කෙරේ අවධානය යොමු කිරීමේදී අපගේ දැක්ම වී ඇත්තේ දැනට අධ්‍යාපන ක‍්‍රමය මෙහෙයවන ශී‍්‍ර.ල.අ.පරිපාලන සේවය, ශී‍්‍ර.ල.ගුරු අධ්‍යාපනඥ සේවය, ශී‍්‍ර.ල.විදුහල්පති සේවය හා ශී‍්‍ර.ල.ගුරු සේවය යන සේවාවන් වල සේවා ව්‍යවස්ථා පැහැදිලිව සම්පාදනය වී තිබියදී එම සේවා ව්‍යවස්ථා උල්ලංඝණය කරමින් ගෙන යන කි‍්‍රයාවලිය වෙනුවට මෙම සේවා ව්‍යවස්ථාවන් විධිමත්ව කි‍්‍රයාත්මක කිරීමෙන් අධ්‍යාපන පද්ධතිය තුළ ඇති වී තිබෙන බිඳ වැටීම වළක්වා ගත හැකිව ඇත.
සේවා ව්‍යවස්ථාවන් තුළ අදාල සේවාවන් සඳහා බඳවා ගැනීම්, උසස්වීම් පිළිබඳ පැහැදිලි නිර්ණායකයන් තිබියදී ඒවා උල්ලංඝණය කරමින් දේශපාලන හිතවත්කම් මත පත්වීම් හා උසස්වීම් පිරිනැමීම තුළ ඇති කඩා වැටීම පිළියම නව අධ්‍යාපන පනතක් ඇති කිරීම පමණක් නොවන අතර අවශ්‍ය වන්නේ සේවා ව්‍යවස්ථාවන් අකුරටම කි‍්‍රයාත්මක කිරීම බව අපි අවධාරණය කරමු.
එසේ වුවද නව පනතක සාකච්ඡාවට ප‍්‍රවිෂ්ඨවීම සංගමයක් වශයෙන් අපි අතපසු නොකරමු. එසේම 1994 ඇති කරන ලද ගුරු සේවා ව්‍යවස්ථාව අනුව ලද මාණ්ඩලික වරප‍්‍රසාද අහිමි කරමින් ගුරු සේවය හා විදුහල්පති සේවයට අත් කර ඇති තත්වය සඳහා පහත උදාහරණ කිහිපයද දැක්විය හැක.
ආපදා ණය නව වැටුප් තල අනුව නොගෙවීම, ශී‍්‍ර.ල.ගු.සේ. 2-සස, 2-ස හා 1 පන්තිය හා ශී‍්‍ර.ල.වි.සේ. 2-සස, 2-ස හා 1 පන්තිවලට අදාළ වන පරිදි පැවති මාණ්ඩලික තත්වය අහෝසි කිරීම, ඒ අනුව බලපාන සංයුක්ත දීමනා අහිමි කිරීම, මගින් ගුරු-විදුහල්පති වරු භූක්ති විඳි අයිතිවාසිකම් උදුරාගෙන ඇත. රා.ප.ච. 2/97 අනුව වැටුප් කප්පාදු කොට දීප ව්‍යාප්ත සේවා හා සමගාමීව පැවති වැටුප් පරිමාණ ගුරුවරුන්ට හා විදුහල්පතිවරුන්ට අහිමි කළේය. 2/97 (සසස* රා.ප.ච. ලේඛනයෙන් ශී‍්‍ර.ල.ගු.සේ. හා ශී‍්‍ර.ල.වි.සේ. ඉවත් කොට ඇත. ශී‍්‍ර ලංකා මහ බැංකු වාර්තා අනුව ගුරුවරුන්ගේ වැටුප්වල මූර්ත අගය වේගයෙන් පහත වැටී ඇති බව ප්රකාශ විය.
ශී‍්‍ර ලංකා අධ්‍යාපන පද්ධතියේ ධනනිධි වාර්තාවේද (ී5 - 12) ඉන්දියාව, බංගලාදේශය, මැලේසියාව, තායිලන්තය හා දකුණු කොරියාව වැනි රටවල ගුරුවරුන්ගේ ප‍්‍රතිශීර්ෂ ආදායමේ අනුපාතයන් ලෙස ගත්කළ සාපේක්‍ෂව අඩක් පමණ හෝ ඊටත් අඩු වූ පහත් වැටුප් ශී‍්‍ර ලංකාවේ ගුරුවරුන්ට නියම වීම යන්නෙන් සඳහන් වී තිබේ. කේන්ද්‍රීය භූමිකාවක් ඉටුකරන ගුරුවරයා මෙලෙස බලයටපත් සෑම රාජ්‍යයකින්ම නොසලකා හැර තිබේ. පාසල් අධ්‍යාපනය ලබන සිසුන් වෙත ඍජු බලපෑම් එල්ල කරන නියමුවා ගුරුවරයා වුවද, ඔහුගේ ඇයගේ සේවය අවතක්සේරු කර තිබේ. 2007/20 ජාතික ගුරුමාරු ප්රතිපත්තිය නියමිත පරිදි කි‍්‍රයාත්මක නොවේ. සෑම කලාප කාර්යාලයකම සැලසුම් මණ්ඩලයක් තිබෙන මුත් නියමාකාරයෙන් ගුරුවරුන්ගේ තොරතුරු නොමැත. දේශපාලකයින්ගේ හා නිලධාරීන්ගේ අත්තනෝමතික මාරු කිරීම් නිසා පාසල් පද්ධතිය අයහපත් තත්වයට ඇද වැටෙයි. වාර්ෂික වැටුප් වර්ධක, හිඟ වැටුප් ආදිය නියමිත කාලයට ගුරුවරයාට නොලැබේ. නව වැටුප් චක‍්‍රලේඛවලට අනුව වැටුප් පරිවර්තනය කිරීමේදී බොහෝ අඩුපාඩු සිදුවේ. මාසිකව ලබා ගන්නා සොච්චම පවා හරියාකාරව නිරවුල්කර නැත. සාධාරණ වැටුප් ක‍්‍රමයක් ලංකා ගුරු සංගමය ඉදිරිපත් කළද රජය ඒ ගැන මුනිවත රකී.
වර්ෂ 2007 සිට ශී‍්‍ර ලංකාවේ පාසල් කි‍්‍රයාත්මක කරන නව සහශ‍්‍රකයේ පළමුවන විෂයමාලා ප‍්‍රතිසංස්කරණය සීඝ‍්‍රයෙන් වෙනස්වන වර්තමාන ලෝකයට ගැලපෙන විෂයමාලා කිහිපයක් පාසල් තලයට හඳුන්වා දී ඇති නමුත් දරුවාට නිපුණතාවක් අත්කර දීමට අවශ්‍ය කි‍්‍රයාකාරකම් දිසානුගත කිරීමට, ඉගෙනුම් ලාභීන් කේන්ද්‍ර කොට ගෙන මෙම කර්තව්‍යයේ නියැලීම සඳහා ගුරුවරයාට සංකීර්ණ වැඩ කොටසක් කිරීමට සිදු වී ඇත. අධ්‍යාපන ක්‍ෂේත‍්‍රයේ සියලූ වගකිව යුත්තන් මෙම ගුරුවරුන් ගැනවත්, වර්තමාන අධ්‍යාපන ප‍්‍රවනතාවන්ට හා දෙස් විදෙස් අධ්‍යාපන තත්වයන්ට ගැලපෙන පරිදි පාසල තුළ කි‍්‍රයාත්මක වන නිපුණතා පාදක විෂය මාලාවේ ස්වභාවය පිළිබඳවත් අවබෝධ කරගෙන නොමැතිවීම කනගාටුවට කරුණකි. විෂයමාලා කේන්ද්‍රකොට ගත් ජාතික දැක්මක් අප රටේ මේ වන විටත් ගොඩ නැගීනොතිබීම, අධ්‍යාපන ක්‍ෂේත‍්‍රයේ වගකිව යුතු ආයතන අතර මනා සම්බන්ධීකරණයක් ගොඩ නොනැගීම, අදාළ අංශ භාර නිලධාරීන්ගේ කැපවීම දුර්වල තත්වයක තිබීම විෂයමාලා හරහා පාසල් තලයේ කැපී පෙනෙන වෙනසක් ඇති කිරීම සඳහා විෂය මාලාව කේන්ද්‍රකර ගත් දර්ශනයක් බලදාරීන්ට නොතිබීම අවසන අධ්‍යාපන පරිහානියට හේතු කාරණා වී තිබේ.
විෂය මාලා ප්රතිසංස්කරණ කි‍්‍රයාවට නැංවිම සඳහා ගුරුභවතුන් පුහුණු කිරීමේ වගකීම පැවරී තිබෙන කලාප හා කොට්ඨාස මට්ටමේ විෂය අධ්‍යක්ෂවරුන්ට හා ගුරු උපදේශකවරුන්ට ප‍්‍රමාණවත් දැනුමක් නොතිබීම නිසාම නව අධ්‍යාපන ප්රතිසංස්කරණ කි‍්‍රයාවලියට කනකොකා හඬන දිනය වැඩි ඈතක නොවේ. ප්රතිසංස්කරණ ඉතිහාසය තුළින් මෙම අසාර්ථක වීමට ඕනෑ තරම් සාක්ෂි සොයා ගත හැකිය. ගුණ නැණ බලෙන් යුතු නිලධාරීන්ට පත්වීමට වරම් නොලැබීමද මීට බලපාන ප‍්‍රධාන හේතු අතර වේ. අධීක්ෂණය හා නියාමනය නොමැතිව පාසල් දරුවන්ට විෂය මාලාවේන් ලැබෙන විපුල ඵල නෙලා ගැනීමට නොහැකි වී ඇත්තේ ආයතන ප‍්‍රධානීන් දේශපාලන හිතවත්කමට පත්වීම් ලැබීම හේතුවෙන්ය. ලංකා ගුරු සංගමය වන අපි දිගින් දිගට පෙනී සිටියේ සැබෑ වෙනසක් ඇති කිරීම සඳහාය. එබැවින් අපි අපගේ යෝජනා, අදහස් සහ ආකල්ප මෙසේ ඉදිරිපත් කරමු.
යෝජිත ආණ්ඩුක‍්‍රම ව්‍යවස්ථා සංශෝධනයේ දී අත්‍යවශ්‍යයෙන්ම කළ යුතු සංශෝධන මොනවා ද ? එයට අදාලව කම්කරු පන්තියේ වගකීම
ඉහත සදහන් මතෘකාව යටතේ වෘත්තීය සමිති මහා සම්මේලනය සංවිධානය කරනු ලබන සංවාදාත්මක මාසික අධ්‍යාපනික වැඩසටහන,
දිනය - 2010-08-31
වේලාව - ප.ව 3.30 සිට - 5.30 දකිවා
ස්ථානය - රාජගිරිය MDDR ශ‍්‍රවණාගරයේදී
විශේෂ ආරාධිත දේශනය - එස්.ජී. පුංචිහේවා මහාතා
පාසැල්වල දෙවන වාර විභාග නැවතත් අවුලකට
(ජුලි 09, 2010) පාසැල් මට්ටමෙන් වාරවිභාග සිදු කිරීම නිසා පැවති ව්‍යාකූලතාවය මග හැරවීමට අධ්‍යාපන අමාත්‍යංශය විසින් පසැල් වාර විභාගය ඒකාබද්ධව කිරීමේ නියාමක ව්‍යාපෘතිය යනුවෙන් වැඩපිළිවෙලක් සකස්කර, පාසැල් වාර විභාග ජාතික මට්ටමෙන්, අධ්‍යාපන අමාත්‍යංශයේ මෙහෙයවීම මත, පළාත් අධ්‍යාපන කාර්යාල වල අධීක්ෂණය යටතේ කලාප අධ්‍යාපන කාර්යාල හරහා සෑම පාසැලකටම එකම ප‍්‍රශ්ණ පත‍්‍රයක් ලබා දෙන ලදී.
එසේ තිබියදී හිටපු අධ්‍යාපන ලේකම් එම්.එම්.ඞී. බණ්ඩාර මහතා විසින් 2010-04-23 දින නිකුත් කරන ලද අංක 2010/16 දරන චක්රලේඛය මගින් වාර විභාග නැවත පාසැල් මට්ටමින් පවත්වන ලෙස දැනුම් දී ඇත. එසේම එම චක‍්‍ර ලේඛයේ 5වන වගන්තියේ සඳහන් කොට ඇත්තේ. ඒ සදහා මුදල් ප‍්‍රතිපාදන, පාසැල් සංවර්ධන සමිති හා පාසැල් නගා සිටුවීමේ සමිතිවල ගිණුම් හා පාසැල්වල පහසුකම් සහ සේවා ගාස්තු ගිණුමෙන් ලබාගත යුතු බවයි.
එම චක්රලේඛයට විරෝධය ඵල කරමින් ලංකා ගුරු සංගමය අධ්‍යාපන ඇමතිවරයාට 2010-05-18 දින ලිපියකින් යවන ලද අතර, එම ලිපියෙන් ඉල්ලා සිටින ලද්දේ නැවතත් පලාත් මට්ටමෙන් පෙර පැවති පරිධි විධිමත්ව පාසැල් වාර විභාග පවත්වන ලෙසයි. එම ලිපියට මේ දක්වා පිළිතුරක් ලබා නොදුන් අධ්‍යාපන අමාත්‍යංශය හිටපු ලේකම්ගේ අත්සනින් නිකුත් කල 2010/16 චක‍්‍ර ලේඛය අනුව වාර විභාග පැවැත්වීමට කටයුතු කරමින් සිටීයි. වාර විභාග ප‍්‍රශ්න පත‍්‍ර සදහා වියදම් පියවා ගතයුතු ආකාරය පැහැදිලිවම චක‍්‍ර ලේඛයේ දක්වා තිබීයදීත් සමහර පාසැල්වල මුදල් එකතු කිරීම අරඹා ඇත.
ලංකා ගුරු සංගමය ඉල්ලා සිටින්නේ පාසැල් මට්ටමින් විභාග පැවැත්වීමේදී, සිදුවු අක‍්‍රමවත්භාවය සැලකිල්ලට ගෙන ජාතික මට්ටමෙන් වාර විභාග පැවැත්වීමට ගත් කීරණය එලෙස ක‍්‍රියාත්මක කරන ලෙසත් මේ වන විට පාසැල් මට්ටමින් විභාග පැවැත්වීමට අදාලව නිකුත් කළ චක‍්‍රලේඛයද උල්ලංඝණය කරමින් සිදුකරන මුදල් එකතු කිරීම නතර කරන ලෙසත් ය.
සම්පත්දායකයින්ට ගෙවීමට බව කියමින් ගුරු වැඩමුළුවේදී මුදල් එකතු කළ ගුරු උපදේශක අතේ කෝට්‌
කරුණාරත්න ගමගේ (දිවයින, ජුලි 01, 2010)
අනුරාධපුර දිස්‌ත්‍රික්‌කයට අයත් කැකිරාව කලාපයේ ගුරුවර ගුරුවරියන් 40 දෙනකු සඳහා පැවැත්වෙන සිව්දින සේවාස්ථ වැඩමුළුවක සම්පත්දායකයින්ට දීමනා ගෙවීම සඳහා බව පවසමින් ඊට සහභාගි වූ ගුරු භවතුන්ගෙන් එක් අයකුගෙන් රුපියල් 250 බැගින් නීති විරෝධී ලෙස මුදල් එකතු කළ ගුරු උපදේශකවරයකු අතටම අල්ලා ගැනීමට කැකිරාව කලාප අධ්‍යාපන අධ්යක්ෂවරයා ඊයේ (30) සමත් විය.
පසුගිය 28 වැනිදායින් ආරම්භ වී අද (1 දා) අවසන් වීමට නියමිත මෙම සේවාස්ථ වැඩමුළුවට සහභාගිව සිටි ගුරුවරුන්ගෙන් මෙසේ නීති විරෝධී ලෙස මුදල් එකතු කරන බව කැකිරාව කලාප අධ්‍යාපන අධ්‍යක්‍ෂ ඡේ. කේ. ඒ. එම්. යූ. ජයලත් මහතාට ඊයේ (30) පෙරවරුවේ දැනගන්නට ලැබුණේ "දිවයින" කළ කරුණු විමසීමකදීය.
තමන් මේ පිළිබඳව වහාම සොයා බලන බව කී අධ්‍යාපන අධ්යක්ෂවරයා සේවාස්ථ වැඩමුළුව පැවැත්වෙන කැකිරාව සම්පත් මධ්‍යස්‌ථානය වෙත එවේලේම පිටත්ව ගොස් තිබේ.
එහි ගොස් ඊට සහභාගිවී සිටි ගුරු භවතුන්ගෙන් විමසීමේදී අදාළ ගුරු උපදේශකවරයාගේ උපදෙස්‌ මත තමන් රුපියල් 250 බැගින් මුදල් ලබාදුන් බව කීහ. වැඩමුළුවේ සම්පත් දායකයින් සඳහා පමණක් නොව ඊට සහභාගි වන ගුරු භවතුන් සඳහා ද දීමනා සඳහා අධ්‍යාපන දෙපාර්තමේන්තුව මගින් මුදල් වෙන්කොට තිබෙන බව දැනුම් දුන්නේය.
එම නිසා නීති විරෝධී ලෙස එකතු කළ රුපියල් 10,000 ක මුදල ආපසු ගුරුවරුන්ට තමන් ඉදිරිපිටදීම බෙදාදෙන ලෙස අදාළ ගුරු උපදේශකවරයාට නියෝග කොට තිබේ.
මේ සම්බන්ධයෙන් දිවයිනට අදහස් දැක්‌වූ කැකිරාව කලාප අධ්‍යාපන අධ්‍යක්‍ෂ ජයලත් මහතා මෙම නීති විරෝධී මුදල් එකතු කිරීම පිළිබඳව දැනුම්දීම ගැන සිය ස්‌තුතිය පිරිනමන බවද කීය.
මෙම නීති විරෝධී මුදල් එකතු කිරීම කළ ගුරු උපදේශකවරයා පිළිබඳව විනය ක්‍රියා මාර්ග ගන්නා බව ද පැවැසීය.
සේවා අවශ්‍යතා යෑයි කියා ගුරුවරුන් දේශපාලන අවශ්‍යතා මත මාරු කරලා
(2010 ජුනි 17)කැලණිය අධ්‍යාපන කලාපයේ මහර වත්තල කැලණිය හා බියගම අධ්‍යාපන කොට්‌ඨාසවලට අයත් ගුරු භවතුන් 60 කට අධික සංඛ්‍යාවකට සේවා අවශ්‍යතාවය යෑයි පවසමින්, දේශපාලන අවශ්‍යතා මත මාරුකොට යවා ඇතැයි ලංකා ගුරු සංගමය චෝදනා කරයි.
ලංකා ගුරු සංගමයේ සභාපති ජෝශප් ස්‌ටාලින් මහතාගේ අත්සනින් නිකුත් කර ඇති එම නිවේදනයේ මෙසේද සඳහන් වේ.
කැලණිය අධ්‍යාපන කලාපයේ මහර, වත්තල, කැලණිය, බියගම යන කොට්‌ඨාසවලට අයත් ගුරුවර ගුරුවරියන් 60 කට අධික සංඛ්‍යාවකට සේවා අවශ්‍යතාවට යෑයි සලකමින් දේශපාලකයන් මැදිහත්වීමෙන් නීති විරෝධීව ස්‌ථාන මාරු කොට ඇත. 2007/20 ජාතික ගුරු මාරු ප්‍රතිපත්තියට අනුව ගුරු මාරු මණ්ඩල හරහා ගුරු මාරුවීම් සිදු කළ යුතුව තිබියදී ඊට පරිබාහිරව සහ ගුරු මාරු මණ්‌ඩලවලින් තොරව මෙසේ සිදුකර ඇති මාරුවීම් වහා නවතන ලෙස ලංකා ගුරු සංගමය බස්‌නාහිර පළාත් අධ්‍යාපන බලධාරීන්ට දන්වා සිටියි.
වසර මැද මෙසේ අවිධිමත් ලෙස ගුරු මාරු සිදු කිරීමෙන් සිසුන්ගේ අධ්‍යාපනයට දැඩි බලපෑමක්‌ ඇතිවන අතර ශිෂ්‍යත්ව විභාගයට සහ අ.පො.ස. සා.පෙළ පංතිවල ඉගෙනුම ලබන සිසු සිසුවියන්ට වන බලපෑම බරපතලය. සේවා අවශ්‍යතා මත යෑයි සඳහන් කරමින් මෙ මාරුවීම් සිදු කළත් ඇතැම් ගුරුවරුන්ට මාරු කර යවන ලද පාසල්වල වැඩ භාරදී නැත.
ප්‍රාදේශීය දේශපාලකයන් තම හිතවතුන්ට පහසු සහ ජනප්‍රිය පාසල් ලබා දීම සඳහා මෙම මාරුවීම් උපයෝගීකොට තිබීම විශේෂත්වයකි. මේ ආකාරයෙන්ම මීගමුව අධ්‍යාපන කලාපයේ මෙන්ම බස්‌නාහිර පළාතේ කලාප කිහිපයකම මෙසේ අවිධිමත් ලෙස ගුරු මාරුවීම් සිදු කර ඇත.
කැලණිය කලාප අධ්‍යාපන අධ්යක්ෂවරයා ස්‌ථානමාරු ලබාදීමට ගුරුවරුන්ට ලබාදී ඇති ලිපියේ වගන්ති කිහිපයක්‌ම තම බලය අනිසි ලෙස උපයෝගී කරගෙන සඳහන් කර තිබීමද විශේෂත්වයකි. මේ පිළිබඳ සොයා බලා මෙම මාරුවිම් නතර කරන ලෙසද පළාතේ සියලු මාරුවීම් ජාතික මාරු ප්‍රතිපත්තියට අනුව සිදුකරන ලෙස ලංකා ගුරු සංගමය බස්‌නාහිර පළාත් අධ්‍යාපන බලධාරීන්ට දන්වා සිටියි.
ළමා මන්දපෝෂණ මට්‌ටම වැඩිවෙයි
ඒමන්ති මාරඹේ (දිවයින)
(ජුනි 09ල 2010) සෞඛ්‍ය දර්ශක ගණනාවක්‌ අතින් ශ්‍රී ලංකාව ලොව සෙසු රටවල් අභිබවා ඉදිරියෙන් සිටියද මෙරට ළමා මන්දපෝෂණ මට්‌ටම වැඩිවෙමින් පැවැතීම හේතුවෙන් අලුතින් උපත ලබන දරුවන්ගෙන් සියයට 16.6 ක් නියමිත බරට වඩා අඩු බරකින් යුතු වන බව අලුතින්ම සිදුකරන ලද සෞඛ්‍ය සමීක්‍ෂණයකදී අනාවරණය වී තිබේ.
මෙරට වාර්ෂික දරු උපත් සංඛ්‍යාව ලක්‍ෂ තුනක්‌ පමණ වේ. ඒ අනුව මෙම නව දරු උපත්වලින් සියයට 16.6 ක ප්‍රතිශතයක්‌ පැවැතිය යුතු නියමිත උපත් බර වන කිලෝග්‍රෑම් 2.5 ට වඩා අඩු බරකින් යුතුය. ශ්‍රී ලංකාවේ වයස අවුරුදු පහට අඩු ළමුන්ගෙන් සියයට 15 ක් දරුණු මන්දපෝෂණ තත්ත්වයකින් ද සියයට 18 ක් සංජානනීය මන්දපෝෂණ තත්ත්වයෙන් හා සියයට 22 ක් අඩු බරකින් යුතු වන බව එම සමීක්‍ෂණ වාර්තාව පෙන්වා දෙයි.
මෙරට වයස අවුරුදු පහට අඩු ළමුන් අතර පවතින උග්ර මන්දපෝෂණ තත්ත්වය පසුගිය වසර තිහක කාලය පුරාම නොවෙනස්‌ව පවතින බව ද එම වාර්තාවෙහි සඳහන් වේ.
වසර 2006/2007 කාලසීමාවේදී මෙරට දිස්‌ත්‍රික්‌ක 20 ක් ආශ්‍රිතව සිදුකරන ලද සමීක්‍ෂණයකට අනුව සංජානනීය මන්දපෝෂණයෙන් පෙළෙන ළමුන්ගේ සංඛ්‍යාව සියයට 8 සිට සියයට 41 දක්වා විය.
ළමුන් අතර පවතින මන්දපෝෂණ තත්ත්වයට මවුවරුන් තුළ පවතින මන්දපෝෂණ තත්ත්වයන් මෙන්ම දිනෙන් දින ඉහළ යන ආහාර මිල ගණන් හමුවේ බොහෝ දුගී පවුල් පෝෂ්‍යදායී ආහාර වර්ග පරිභෝජනය කිරීම සීමා කරමින් පෝෂණ මට්ටමින් අඩු ආහාර පරිභෝජනය කිරීමට පෙළඹීම යන කරුණු බලපා ඇතැයි පෝෂණවේදීහු පෙන්වා දෙති.
ඔවුනට අනුqව ශ්‍රී ලංකාවේ අධික දුගී බවින් පෙළෙන සියයට 20 ක ප්‍රතිශතය දිනකට ලබන ආදායම ඇමරිකානු ඩොලර් 2 ක (රුපියල් 220 ක් පමණ) වන අතර එම මුදලින් සියයට හැටක්‌ම (රුපියල් 120 ක් පමණ) වැය කෙරෙනුයේ ආහාර වෙනුවෙනි.
ළමා මන්දපෝෂණය ඉහළ යැමත් සමඟම නව යොවුන් පිරිමින්ගෙන් සියයට 32 ක් හා ගැහැනු දරුවන්ගෙන් සියයට 25 ක් කෘෂ තත්ත්වයෙන් (උසට සරිලන බරක්‌ නොමැතිවීම) පෙළෙන බව අනාවරණය වී තිබේ.
සමීක්‍ෂණයට අනුව මෙරට වයස අවුරුදු 15-49 වයස්‌ කාණ්‌ඩයට අයත් කාන්තාවන්ගෙන් සියයට 16.2 ක් මන්දපෝෂණයෙන් පෙළෙන අතර සියයට 31.6 ක් නිරක්‌තියෙන් (රක්‌තහීනතාවය) පෙළෙති. නව යොවුන් දරුවන්ගෙන් සියයට 22.3 ක් නිරක්‌තියෙන්ද, වයස මාස 6 සිට අවුරුදු පහ දක්වා වයස්‌ කාණ්‌ඩයෙහි පසුවන ළමුන්ගෙන් සියයට 29.3 ක් විටමින් ඒ ඌනතාවයෙන් පෙළෙන බව ද හෙළිවී තිබේ. විටමින් ඒ ඌණතාවයෙන් පෙළෙන ළමුන්ගෙන් සියයට 2.3 ක්‌ම උග්ර විටමින් ඒ ඌනතාවයෙන් පෙළෙන බව පෝෂණවේදීහු පවසති.
පඩි මදිනම් ආපසු ගුරු සේවයට යන්න; විදුහල්පතිවරු පන්දහසකට අධ්‍යාපන අමාත්‍යංශයෙන් චක්‍රලේඛයක්‌
නිලන්ත මදුරාවල (දිවයින)
ගුරු සේවයේ සිට විදුහල්පති සේවයට පත්වූ විදුහල්පතිවරුන් පන්දාහසකට පමණ ගුරු සේවයේ සිටියදී ලැබූ වැටුපට වඩා අඩු වැටුපක්‌ ලැබීම හේතුවෙන් ඔවුහු දැඩි දුෂ්කරතාවකට මුහුණ දී සිටිති. මෙලෙස වැටුප් අඩු වීමේ ගැටලුවට පිළියමක්‌ වශයෙන් අධ්‍යාපන අමාත්‍යංශය චක්‍රලේඛයක්‌ මගින් ඔවුන්ට දැනුම් දී ඇත්තේ විදුහල්පති සේවයෙන් ඉවත් වී යළි ගුරු සේවයට ම අන්තරග්‍රහණය වන ලෙසයි. එම චක්රලේඛයට අනුව යළි ගුරු සේවයට යැමට අකමැති නම් අඩු වැටුපක්‌ ලබමින් විදුහල්පතිවරුන් වශයෙන් කටයුතු කරන බවට අධ්‍යාපන අමාත්‍යාංශයට දිවුරුම් ප්‍රකාශයක්‌ ඉදිරිපත් කළ යුතුය.
2000 වසරින් පසුව විදුහල්පති සේවයට පත් වූ විදුහල්පතිවරුන් මෙම ගැටලුවට මුහුණ දී සිටිති. තරග විභාග අභියෝග ජයගෙන ඉතා අපහසුවෙන් විදුහල්පති සේවයට පත්වූ ඔවුහු මෙම තත්ත්වය හමුවේ කළ යුත්තේ කුමක්‌ද යන්න පිළිබඳව සිතා ගත නොහැකිව වික්‍ෂිප්තව සිටිති.
විදුහල්පති සේවයට බඳවා ගැනීම සඳහා 2005 වසරේ පැවැත්වූ තරග විභාගයේ ප්රතිඵල මත විදුහල්පති සේවයට ඔවුන් බඳවා ගත්තේ වසර පහකට පසුව එනම් 2010 වසරේදීය.
1999 වසරේ පැවති තරග විභාගයෙන් සමත් වූවන්ට විදුහල්පති සේවයට පත්වීම් ලබා දුන්නේ වසර 2002 දීය. තරග විභාගයට පෙනී සිටීමෙන් පසුව විදුහල්පති සේවයේ පත්වීම් ලැබීම ප්‍රමාද වීම නිසා ගුරු සේවයේ ඔවුන් ලබන වැටුප ක්‍රමයෙන් ඉහළ යයි.
නව විදුහල්පතිවරුන්ට ගුරු සේවයට වඩා අඩු වැටුපක්‌ ලැබීමේ ගැටලුව මතුව ඇත්තේ ඒ අනුවය. තරග විභාග පවත්වා වසරින් වසර විදුහල්පති සේවයේ පුරප්පාඩු පිරවීමට අමාත්‍යාංශය කටයුතු කරන්නේ නම් මෙම ගැටලුව ඇති නොවන බව නව විදුහල්පතිවරු ප්රකාශ කරති.
කෙසේ වුවද මෙම විදුහල්පතිවරුන්ගේ ගැටලුවට පිළියමක්‌ වශයෙන් අමාත්‍යාංශය නිකුත් කර ඇති 2010/12 චක්රලේඛය අවලංගු කර ඔවුන්ට සහනයක්‌ සලසන ලෙස ලංකා ගුරු සංගමය ජනාධිපති මහින්ද රාජපක්‍ෂ මහතාගෙන් ඉල්ලා ඇත.
Subscribe to:
Posts (Atom)
