(2010 ජුනි 17)කැලණිය අධ්‍යාපන කලාපයේ මහර වත්තල කැලණිය හා බියගම අධ්‍යාපන කොට්‌ඨාසවලට අයත් ගුරු භවතුන් 60 කට අධික සංඛ්‍යාවකට සේවා අවශ්‍යතාවය යෑයි පවසමින්, දේශපාලන අවශ්‍යතා මත මාරුකොට යවා ඇතැයි ලංකා ගුරු සංගමය චෝදනා කරයි.
ලංකා ගුරු සංගමයේ සභාපති ජෝශප් ස්‌ටාලින් මහතාගේ අත්සනින් නිකුත් කර ඇති එම නිවේදනයේ මෙසේද සඳහන් වේ.
කැලණිය අධ්‍යාපන කලාපයේ මහර, වත්තල, කැලණිය, බියගම යන කොට්‌ඨාසවලට අයත් ගුරුවර ගුරුවරියන් 60 කට අධික සංඛ්‍යාවකට සේවා අවශ්‍යතාවට යෑයි සලකමින් දේශපාලකයන් මැදිහත්වීමෙන් නීති විරෝධීව ස්‌ථාන මාරු කොට ඇත. 2007/20 ජාතික ගුරු මාරු ප්‍රතිපත්තියට අනුව ගුරු මාරු මණ්‌ඩල හරහා ගුරු මාරුවීම් සිදු කළ යුතුව තිබියදී ඊට පරිබාහිරව සහ ගුරු මාරු මණ්‌ඩලවලින් තොරව මෙසේ සිදුකර ඇති මාරුවීම් වහා නවතන ලෙස ලංකා ගුරු සංගමය බස්‌නාහිර පළාත් අධ්‍යාපන බලධාරීන්ට දන්වා සිටියි.
වසර මැද මෙසේ අවිධිමත් ලෙස ගුරු මාරු සිදු කිරීමෙන් සිසුන්ගේ අධ්‍යාපනයට දැඩි බලපෑමක්‌ ඇතිවන අතර ශිෂ්‍යත්ව විභාගයට සහ අ.පො.ස. සා.පෙළ පංතිවල ඉගෙනුම ලබන සිසු සිසුවියන්ට වන බලපෑම බරපතලය. සේවා අවශ්‍යතා මත යෑයි සඳහන් කරමින් මෙ මාරුවීම් සිදු කළත් ඇතැම් ගුරුවරුන්ට මාරු කර යවන ලද පාසල්වල වැඩ භාරදී නැත.
ප්‍රාදේශීය දේශපාලකයන් තම හිතවතුන්ට පහසු සහ ජනප්‍රිය පාසල් ලබා දීම සඳහා මෙම මාරුවීම් උපයෝගීකොට තිබීම විශේෂත්වයකි. මේ ආකාරයෙන්ම මීගමුව අධ්‍යාපන කලාපයේ මෙන්ම බස්‌නාහිර පළාතේ කලාප කිහිපයකම මෙසේ අවිධිමත් ලෙස ගුරු මාරුවීම් සිදු කර ඇත.
කැලණිය කලාප අධ්‍යාපන අධ්‍යක්‌ෂවරයා ස්‌ථානමාරු ලබාදීමට ගුරුවරුන්ට ලබාදී ඇති ලිපියේ වගන්ති කිහිපයක්‌ම තම බලය අනිසි ලෙස උපයෝගී කරගෙන සඳහන් කර තිබීමද විශේෂත්වයකි. මේ පිළිබඳ සොයා බලා මෙම මාරුවිම් නතර කරන ලෙසද පළාතේ සියලු මාරුවීම් ජාතික මාරු ප්‍රතිපත්තියට අනුව සිදුකරන ලෙස ලංකා ගුරු සංගමය බස්‌නාහිර පළාත් අධ්‍යාපන බලධාරීන්ට දන්වා සිටියි.
සේවා අවශ්‍යතා යෑයි කියා ගුරුවරුන් දේශපාලන අවශ්‍යතා මත මාරු කරලා
Subscribe to:
Post Comments (Atom)
0 comments:
Post a Comment